吴语小文:老八

花小囡7个月前吴语小文377

        大家好,今朝小囡来讲一只故事,故事的主人公是崇明岛陈家镇裕安村的老八。老八今年71岁,一世人生老老实实地里做,和老太婆两个人,种仔10亩地,包仔3亩蟹塘,恁(nèn,那样)大年纪还仍然背脊佝(gōu,驼背)起仔,拼命做生活。屋里前年间起好三层小楼,场心(院子)300多个平方,老实话日子本来过得应该算蛮好嘚,阿是?结果乃看伊,天天在地里,皱眉头闭眼睛,唉声叹气。


src=http___n.sinaimg.cn_front_241_w640h401_20190217_ufZv-htacqww2338961.jpg&refer=http___n.sinaimg.jpeg

    

        为仔何呢?还为仔伊的儿子,儿子做何叫阿爹弗开心呢?大家可能猜阿猜的着,崇明人赌铜钿(tián,钱财)!诶!对了,一话到赌么大家侪(chái,都)戳心噢。老古董说话话得好,叫“家财再富,经勿起三年穷赌。”,还有一句叫“吃喝嫖赌四样全,沈万三家当败的完。”伊的儿子,学堂去到初中毕业就出去寻生活,学过木匠、泥水匠,侪嫌太吃力。后来去学车子,跑到上海开出租车,一开出租车么,叫“三好搭一好,三坏搭一坏。”几个一道开车子的朋友,侪喜欢赌铜钿,小八也跟仔赌,当时伊对老婆那话?伊话“小财靠勤俭,大财靠冒险。”结果几年三四过去,小财大财勿看见,开车子铜钿倒败个精光。败精光以后还不算数,去借高利贷,借仔还勿出来,一拍屁股离家出走。拿小囡娘子厾(dū,丢)了屋里,听让她们活也好,死也好。


        儿媳妇打电话拨了老夫妻俩,意思话消灭郎(骂丈夫没出息)欠仔铜钿不回转(回家)嘚,天天有人上门催债,还在门上泼红油漆,墙上写满个“还钱”,“杀”,叫弄得吃饭吃不进,睏(kùn)觉睏不着。小囡还要学堂里去,万一高利贷杀千刀的对小囡下手,哪能办?所以讲男勤女俭么,赛过神仙;反过来如果养仔只消灭郎么,一家人家跑下坡路也快煞个。老八晓得仔情况么,想想这两年也囤了点钞票,问问儿媳,到底欠多少?300万!阿呀呀,300万!大家话话看,乃叫老八,一个老农民哪能办?


        ---等歇,我吃口茶---


        消灭真叫消灭,大家侪话养儿防老,老八不是防老,是要老性命嘚!银行卡里并并足足大概150万,全部拿出来,话笑话叫棺材本一道拿出来嘚,还推扳(差)150万,到何里借去?小队里,亲眷朋友侪晓得,老八的儿子赌铜钿,钞票肯定不肯借拨伊,因为呒(ḿ,没)得底的。老夫妻两介头,睏了床上算,150万,老两个把把结结(节约)10年工夫可以还清爽。10年就10年,起码孙子可以健健康康,安安稳稳长大。好嘚,这世人生就这样了,还做10年,做死脱算数。


        第二天,老八打电话拨了儿媳,叫伊和高利贷话好,不能再利滚利!最多就300万,先还150万,剩下来150万分10年还。那边高利贷一听老两个高兴还么,也一口答应下来,本来还想可能收不着了。格末(那么)话好嘚,不准再骚扰儿媳和孙子,一言为定!


        朝后去,老两个背脊更加佝了,日里夜里要么勒了(在)地里,要么挑羊草,鸡、鸭、鹅、羊侪养嘚,还要么出去卖老毛蟹。看看老两个,叫又黑又瘦,手上皴(cūn)疤,冻瘃(zhú,冻疮)交交关(许多),真叫作孽噢。


        人啊,到底不是铁打的。老八做劲恁(nèn,那样)足,吃么又弗吃何,勒了第三年辰光,终于脱力了,一下子睏倒了。天天碗头上省,筷头上刮,省的着多少? 老八弗怕路远,就怕路短,要是自家撑不住,留下一个老太婆,叫伊日子哪能过?老太婆一介子躲了灶口头,弗晓得哭仔几趟,眼睛天天红隐隐。还好,真额叫天无绝人之路,说话话得好:待人自待自,敬人自敬自。平常辰光,老八做人大大落落,小队里看见何人家要帮忙么,经常伸把手出来。今趟帮伊地里做小工的三个村民,主动表态话覅(fiao,不要)钞票,免费帮伊做,话来叫“便来做”(谁方便有空就帮其他人搭搭手)。小队里其他的一些村民,也来主动帮老八“便来做”。老八眼泪水淌淌滴,朝村民们磕头跽(jì,跪)拜,真额是浇花浇根,帮人帮心,邻舍好,赛金宝。


        格末(那么)老八的病情到底那话?伊跑了南门中心医院,医院喊回头,何意思?病入膏肓,自己转去(回去)吧。大家侪当老八要勒床上等死,事实倒反过来喏!荡里芦青弗怕风,沙浪百姓弗怕穷,老八的革命吃苦精神上来了--天天一日做到夜,顿顿一大碗饭,筷头么也变得大手大脚,吃得进来交关。照伊自家讲“活到哪里是哪里,活一天赚一天,弗想伊(病情)。”半年工夫过去,毛病自己好嘚,到医院里查去,CT一照么,一样呒得何,你话稀奇不稀奇。医生的头掼(guàn,摇)来,也话“稀奇,稀奇,奇迹,奇迹”。


        你说讲话的,医院喊回头,自家反而好嘚?覅瞎吹牛逼噢。呵呵,牛逼弗瞎吹噢,弗相信你乃(现在)跑到他们家地头上看,老夫妻俩保证有搭有档,认真勒了(在)挑大白菜。


        何?阿爹生病儿子转来过啘?有句说话叫“浪子回头金不换”,儿子晓得阿爹生病,还帮伊还债,偷偷叫回转嘚。格天(那天)到仔屋里,老八也力气呒得,骂勿动伊。看看儿子胡子拉渣么,也有点捻摸(心痛,疼爱)伊。儿子朝老爹大开门床前“泼哆”一记跽(jì,跪)了地上,眼泪水溚(dá)溚滴,“阿爹,我弗是人,我弗是人啊。” 老头子伸出手挥挥,身体朝里仄(zè,倾斜)过去,只说了一句“朝后去好好叫,覅再去赌了。”


        盐多仔咸,话多仔烦,我也有点事体,等歇要帮王家阿婆碾米去,今朝故事先讲到这里。何?儿子后来那话?儿子后来登了崇明,呶(náo,拿)小囡娘子上海通转来,一道陪老头子包地方,养蟹塘,一直陪勒了老两个脚跟头。


        好了,老八的故事就先写到这里,感谢阅读,欢迎给我留言哈。别忘了关注我们的微信公众号:吴语小囡,更多精彩等着您,我们下期再见啦。

相关文章

吴语小文:小寿头吃生活

吴语小文:小寿头吃生活

        清晨,我还勒做梦,姆妈刮镬(huò,大锅)锈(刮锅底灰)个声音格外吵,“哗哗哗” ,我精肉皮子走来吃不消...

吴语小文:落雨天

吴语小文:落雨天

        我家的房子是普通的砖瓦房子,两间,一个灶屋间,一个卧房间。虽然落雨天会漏雨,但我认为条件还不算特别差,还...

吴语小文:去姑妈家吃点心,和阿哥打魂斗罗

吴语小文:去姑妈家吃点心,和阿哥打魂斗罗

今天我们一家要去姑姑家吃点心(中饭),姆妈话姑父的父亲从台湾回来了。我晓得台湾岛,它是祖国的第一大岛,而我伲崇明岛是祖国的第三大岛,只不过话台湾公公很有钞票,跟我们不一样。我不晓得今天会不...

吴语小文:老式剃头店

吴语小文:老式剃头店

        今朝礼拜天,作业统统做好嘚,下半天我特仔(和)云海俩已经讲好,我伲一道放鹞子(风筝),伊准备...

发表评论    

◎欢迎参与讨论,请在这里发表您的看法、交流您的观点。